Los próximos díes 2, 3 y 4 de xineru del 2008 va entamase n’Uviéu una nueva Xunta d’Escritores Asturianos que col lema “Lliteratura asturiana y compromisu” y en Lliteratu queremos dedicar un númberu a un eventu tan importante como esti. Estos alcuentros lliterarios tendrán llugar nel marcu de la Biblioteca del Campu San Francisco, nel Paséu del Bombé d’Uviéu, el mesmu sitiu onde se celebró otra Xunta d’Escritores va cerca de dos años col fin d’entamar una bienal de lliteratura asturiana “abierta a tol públicu en xeneral”.

Fuente: Redacción.

Lliteratu.com ufre'l programa completu de la Xunta d'Escritores Asturianos 2008. Trés díes completos nos que la lliteratura va ser protagonista col lema “Lliteratura asturiana y compromisu”

L'escritor Carlos X. Blanco va presentar el miércoles 2 de xineru a les 8,30 la tarde na Biblioteca del Campu San Francisco d'Uviéu, el llibru "La Nación Asturiana", qu'asoleya cola editorial Espublizastur, nel marcu de la Xunta d'Escritores Asturianos 2008. Blanco, con dellos artículos asoleyaos en delles revistes, collaborador en dellos medios, ente ellos Infoasturies.net y con un recién asoleyáu llibru ellectrónicu (en castellán) "Marxismo y Nación Asturiana", espubliza'l so primer llibru con una editorial y de xuru nun será l'últimu. La editorial asturiana Espublizastur entama cola publicación de La Nación Asturiana de Carlos X. Blanco la produición editorial propia, empincipiando cola colección "Ensayu" dirixía a espublizar, como'l propiu nome indica, ensayos en Llingua Asturiana.

Según informaben dende la organización de la Xunta d’Escritores 2008, Trinidad Ruiz va clausurar la Xunta d’Escritores Asturianos 2008 que va celebrase n’Uviéu, na Biblioteca del Campu San Francisco, los díes 2, 3 y 4 de xineru con una conferencia sobre’l llabor editorial nel Estáu y cola presentación d’ún de los sos últimos proyectos editoriales.

L'escritor asturianu Carlos Rubiera abrirá la Xunta d'escritores Asturianos Uviéu 2008 esti próximu miércoles 2 de xineru con una conferencia sobre'l compromisu del escritor asturianu más p'allá de lo estético. L'actu tendrá llugar na Biblioteca del Campu San Francisco a partir de les 5'30 la tarde, llueu de la presentación del llibru d'Actes de la Xunta de 2005. Carlos Rubiera Tuya nació’l 2 de febreru de de 1956 en Cabueñes (Xixón) anque al pocu tiempu la familia treslladose a Garvelles, na parroquia xixonesa de Caldones, onde sigue residiendo anguaño. Tres d’estudiar Maxisteriu na Universidá d'Uviéu y Música nos conservatorios d'Uviéu y Xixón, dedicóse profesionalmente a la enseñanza. Anguaño ye profesor de Música y Asturianu nel colexu El Bosquín de L'Entregu. Carlos Rubiera destaca pol so llabor na difusión de la llingua asturiana, non solo como cantante y escritor, sinón tamién como responsable de les clases de bable na Universidá Popular, o presentador de programes nel centru territorial de Televisión Española y na emisora Radio Mar de Xixón. Yá dende mediaos de los años setenta apaez vinculáu a les actividaes de Conceyu Bable de Xixón y collabora na sección en Alitar Asturies del diariu El Comercio. Dellos años más tarde foi ún de los primeros miembros de númberu de l’Academia de la Llingua Asturiana.