Nacimientu:  26-II-1801 - Uviéu / Oviedo
Defunción:  1-XI-1882 - Uviéu / Oviedo

Nació n´Uviéu el 26 de febreru de 1801.

A los trenta y seis años llegó a ministru de Facienda, col Gabinete del conde de Ofalia, y tuvo al frente´l cargu hasta setiembre de 1838.

El 3 de mayu de 1844 volvió al mesmu puestu, pero daquella fue col Gabinete de Narváez, hasta´l 12 de febreru de 1846.

Dos meses más tarde volvió col Gabinete de Istúriz.

La cuarta vez volvió con Narváez, pero como nun s´arreglaba con él, dimitió´l 19 de agostu de 1849 y ya nun quixo saber más d´aquéllo.

Pero sí fexo otros llabores pa l´Alministración: fue Embaxador nel Vaticano y en Francia, presidente de les Cortes na llegislatura de 1861-62, xefe del Gobiernu que salió en 1864 pol que presidía Arrazola, que tuvo que se retirar, y presidente efectivu de la Compañía de los Ferrocarriles de Madrid a Zaragoza y a Alicante. Aparte de la política, Mon tamién fue académicu fundaor de la Real Academia de Ciencies Morales y Polítiques, y na de Belles Artes de San Fernando, pasó de miembru numerariu a miembru correspondiente, por culpa que siempre faltaba a les sesiones.

Tamién fue director de la Sociedá Económica d´Amigos del País de Asturies, y del Gremiu y Claustru de la Universidá d´Uviéu, decanu honorariu del Colexu d´Abogdos, y taba en toles Sociedaes y Xuntas qu´hubo n´Asturies pa fomentar los intereses morales y materiales de la rexón. Tocó-y vivir tiempos de munchos cambios políticos y de falta perres en Tesoro por culpa les guerres qu´había dientro´l país y polos cambios de gobiernu.

Poro´l sistema tributariu que Mon propunxo caltuviéronlu tolos partíos y copiáronlu tolos gobiernos. Cuando Mon llegó al Ministeriu de Facienda atopó un enguedeyu d´impuestos creaos poles villes y los conceyos, impuestos reales, tributos a la Ilesia y a los monesterios, tributos qu´establecía la Mesta, yera un mecigayu fiscal de cargues qu´esmolecíen al contribuyente español, sobre too a los llabraores, qu´abusaben d´ellos los recaudaores, los organismos y los arrendaores de dellos tributos.

P´acabar con aquello, Mon fexo la llei de 23 de mayu de 1845, que traxo reformes globales importantes qu´ayudaron a ordenar la Facienda española según el pensar científicu más ortodosu qu´había daquella. La novedá más importante que metió fue la "Contribución de inmuebles, cultivo y ganadería" que, anque sorbía otres figures que yá había primero, recaudó casi 199 millones de riales a un rendimientu de 300 millones.

Pero Mon punxo otros impuestos, el testu llegal de 1845 tamién tien otres: contribución de subsidiu de la industria y el comerciu, impuestu de derechos reales, reglamentación del derechu hipotecariu, impuestu de consumo ya impuestu de inquilinatu, l´únicu que quedó fuera de la nueva estructuración yera´l impuestu de timbre. Na historiografía de la Facienda española, Mon fue el primer reformaor y ordenaor del sieglu XIX. La estructura básica de la obra de Mon caltúvose hasta la reforma tributaria de 1964. Morrió n´Uviéu´l 1 de payares de 1882.

<< Listáu de Autores

<< Tornar al Entamu