|
Nacimientu: 26-V-1874 - Navia
Defunción: 1915 - Rosario de Santa Fe (Argentina)
Historiador y llicenciáu en Melicina, nacíu en Navia (La Ferrería) en 1874 y muertu en Rosario de Santa Fe (Arxentina) en 1915. Simultaneando los sos estudios de bachilleratu en Tapia, L.luarca y Xixón y llueu los de Melicina en Santiago de Compostela. Escribió numberosos artículos de Lliteratura, Historia y Socioloxía en periódicos de Navia, L.luarca, Uviéu y Xixón. En 1900 foi ún de los fundadores y de los redactores del diariu “El Porvenir Asturiano” de Xixón. En 1904 emigró a Arxentina onde fizo un cursu en la Universidá de Buenos Aires col enfotu de revalidar el so títulu de mélicu español. Pasó dempués a exercer la so profesión en Rosario de Santa Fe, onde residía un fuerte núcleu d’emigrantes procedentes del occidente asturianu. Ellí llegó a gozar Ferrería de mui bones relaciones como mélicu y escritor, y la so firma apaecía davezu tanto na prensa rexonal arxentina como na de les revistes rexonales españoles. Pero’l so prestixu pue dicise que foi cásique póstumu con motivu de la publicación de la so conocida “Evolución civil y organización agraria de Asturias” que foi editada en Rosario en 1914, poco enantes de morrer. Trátase d’un llibru dedicáu cásique n’esclusiva al conceyu de Navia durante la baxa Edá Media y los Primeros sieglos de la Edá Moderna y qu’aporta dalgunos datos hasta entós inéditos ya interesantes.Foi prologáu pol naviegu residente n’Arxentina, Rafael F. Calzada.
|
LA CITA:
"Vi que teníamos qu’andare, / que la vida yera amable: / tiraríamos p’alantre / p’atopar la llibertade." Eva González
