Alias :  Nicolás Ma.

Oriver, Nicolás Rivero
Nacimientu:  23-IX-1849 - Les Caleyes - Carda (Villaviciosa)
Defunción:  2-VII-1919 - La Víbora, La Habana (Cuba)

Periodista nacíu en Carda (Villaviciosa), el 23 de setiembre de 1849, nel senu d’una familia campesina acomodada.

A los nueve años entró nel Seminariu d’Uviéu y, poco dempués, xunto a otros estudiantes de Llatín, mandáronlu pal acabantes fundar Seminariu de Valdediós (Villaviciosa), onde tuvo por un añu.

Tornó pal Seminariu d’Uviéu pero al poco dexó los hábitos y coló pa la so casa de Villaviciosa, onde s’allugó hasta 1868, data na qu’entamó otra vuelta los estudios.

En 1873 deportáronlu a Cuba, llegando a la islla caribeña’l 16 de xunetu.

Algamó un bon puestu nel Cuartel, pero al poco, enfermu del vómitu negru entró na Quinta del Rey, donde lu atendieron.

De nuevu n’España incorporóse a les files carlistes participando na batalla de Montejurra.

Cuando acabó la guerra pasó pa Francia, xunto a dellos compañeros, donde vivió por un añu, hasta que-y concedieron l’amnistía y tornó pa España n’avientu de 1876.

A los ventiocho años, col sofitu del so tíu’l rector del Seminariu, entamó estudios de Notariáu na Universidá d’Uviéu.

N’acabando la carrera coló de nuevu pa Cuba, país nel qu’exerció como periodista en “El Rayo” y “La Centella”.

Asina mesmo, foi’l fundador de “El Español” y “El Pensamiento Español”, y en xunu de 1895 nomáronlu direutor del “Diario de la Marina”, convirtiéndolu en ún de los periódicos mayor tirada d’Hispanoamérica.

Poco enantes de morrer, el 31 de mayu de 1919, recibió un cablegrama d’Antonio Maura, comunicando-y la concesión real del títulu de conde de Rivero.

El mesmu día recibía notificación del Vaticanu de la encomienda de San Gregoriu Magnu. Murió na Víbora, (L´Habana) el 3 de xunetu de 1919.

<< Listáu de Autores

<< Tornar al Entamu