Alias :  Pedro Rivero
Nacimientu:  22-XII-1764 - La H.arrería / La Herrería, Vibañu / Vibaño (Llanes)
Defunción:  30-I-1836 - Toledo

Cardenal, arzobispu primáu d’España y orador parlamentariu nacíu en La H.arrería, parroquia de Vibañu (Llanes) en 1764.

Fexo los primeros estudios na preceptoría conventual de Celoriu y darréu estudió nes Universidaes d’Uviéu y Sevilla algamando’l gráu de doctor en Teoloxía.

En 1795 gana’l puestu de doctoral del Cabildru d’Uviéu onde foi mui nomáu pola so cultura teolóxica y humanista.

Dominaba’l llatín y el griegu, y falaba n’alemán, inglés, italiano y francés; esti conocimientu llingüísticu servía-y pa tar enteráu de los acontecimientos políticos y culturales europeos.

Sofitó’l llevantu d’Asturies de mayu de 1808 contra les fuercies napoleóniques.

Col entamu del nuevu gobiernu d’Asturies encarguen-y la Secretaría o Ministeriu de Gracia y Xusticia y, en 1810 nómenlu diputáu por Asturies nes Cortes de Cádiz.

Defendió la unidá católica e impuso l’artículu de la Constitución de 1812 referente a la relixón, nel que establecía la Ilesia Católica Apostólica y Romana como creu oficial del Estáu.

Refugó l’afrancesamientu de la Carta Magna pol que se naguaba dende delles estayes de la sociedá. Dempués de la guerra de la Independencia, en 1815, escuéyenlu obispu de Zamora, cargu que desendolcó por diez años.

En 1824 nómenlu primáu d’España en Toledo y darréu cardenal de la Ilesia pol Papa reinante.

Iguó la organización eclesiástica española y foi perseveru cola disciplina del cleru.

Xunto a los llabores eclesiásticos foi miembru de la Real Academia de la Historia y Conseyeru d’Estáu.

Morrió en Toledo en 1836

<< Listáu de Autores

<< Tornar al Entamu