|
Alias : Juan de Posada y Díaz de Noriega
Nacimientu: 14-X-1528 - Posada (Llanes)
Defunción: 3-V-1602 - Salamanca
Eclesiásticu y maxistráu del sieglu XVI. Según Constantino Suárez nació en Posada (Llanes) el 14 d’ochobre de 1528, descendiente de noble llinax. Entamó los estudios en Palencia y continuolos llueu como colexal mayor en Colexu de Santa Cruz, de Valladolid, nel que ingresó n’ochobre de 1560 y onde-y dieron el gráu de doctor en dambos derechos.
Dempués, nesa mesma ciudá foi callóndrigu coles dignidades de provisor y vicecanciller, llabores que fexo al empar de les de profesor d’Universidá. Tornó años dempués pa Palencia como callóndrigu y d’equí coló pa Granada como oidor de la Chancillería. Nesti cargu dio la prueba más notable como home de lletres con motivu de la espulsión de los moriscos, comisionáu pol rei Felipe II pa formar una estadística de los bienes confiscaos. Con esti oxetivu fexó un catastru y escribió una memoria. En xunu de 1582 destinárenlu al Tribunal Supremu de la Inquisición, nel que trabayó durante más de seis años. Llueu, y tras una breve permanencia nel país natal, nombrárenlu presidente de la Chancillería de Valladolid (1589). En 1598 el rei concedió-y la mitra de Salamanca, cargu que desendolcó hasta que morrió’l 3 de mayu de 1602.
|
LA CITA:
"Soi una parte de tolo que topé nel mio camín" Alfred Tennyson
